Galicia sitúase como a sexta comunidade autónoma máis denunciada en casos de neglixencia médico-sanitaria, segundo recolle a ‘Memoria 2019’ da Asociación El Defensor del Paciente, que tamén alerta da intención da Xunta de “privatizar” a sanidade pública. “É a finalidade do Sergas”, lamentan.
Segundo a memoria difundida este luns, recollida por Europa Press, Defensor del Paciente rexistrou en Galicia en 2019 un total de 640 casos denunciados de neglixencias, das que 281 corresponderon á provincia da Coruña; 259 á de Pontevedra; 64 á de Ourense e 36 á de Lugo.
LISTAXES DE AGARDA
Por outra banda, o informe tamén facía referencia ás listaxes de agarda. “Galicia saíu da cola das listas de agarda cando os últimos anos sempre a atopabamos situada entre as peores. No entanto, do mesmo xeito que nos pasa coa comunidade madrileña, somos bastante incrédulos ante a cifra de 56 xornadas para intervención“, expoñen dende Defensor do Paciente.
Esta asociación alerta da actitude do Sergas neste aspecto e afirma que “a súa finalidade non é outra que a de rematar por privatizar a sanidade pública” e mandar os pacientes a clínicas particulares.
