A área de Medio Ambiente do Concello de Lugo decidiu pechar os parques da cidade desde o mediodía deste xoves ante o temporal de vento e choivas. Agárdanse refachos que poden superar os 120 quilómetros por hora.
O fenómeno meteorolóxico adverso obriga a activar o aviso de nivel laranxa por choiva e ventos de ata 100 quilómetros por hora. Afectarán o centro da cidade sobre todo a partir das 16:00 horas, cando tamén se esperan refachos que localmente superen os 120 km/h.
Así, operarios do servizo municipal de Parques e Xardíns precintaron os recintos de Rosalía de Castro e de Frigsa, onde queda “prohibida a entrada”, segundo concretou o Concello. Ademais, fan un chamamento á cidadanía para que respecten as limitacións, “evitando correr riscos innecesarios para non poñer en perigo a súa seguridade”, subliñaron dende o Concello.
