A Plataforma en Defensa da Sanidade e especialidades do HULA e a Federación de Asociacións de Veciños da Provincia de Lugo solicitaron á Consellería de Sanidade o estudo e implantación da técnica robotizada para intervencións cirúrxicas “Da Vinci” no Hospital Universitario Lucus Augusti (HULA).

Segundo informaron estes colectivos, solicitaron a implantación desta técnica robotizada en dous correos electrónicos dirixidos ao gabinete de dirección da Consellería de Sanidade, o 22 de xuño e o 01 de novembro de 2017, así como mediante un escrito dirixido ao propio conselleiro, Jesús Vázquez Almuiña, durante unha das reunións mantidas con el, “sen que até a data houbese resposta algunha”.

“Por este motivo”, aclaran estes colectivos, “publicamente lle solicitan de novo ao conselleiro de Sanidade a implantación desta técnica para a realización de intervencións cirúrxicas no HULA. “Lugo ten dereito a dispor deste robot, actualmente da serie Xi, desenvolvido pola empresa Norte Americana Intuitive Surgical desde o ano 2000, cun custo aproximado de dous millóns de euros, que pode ser adquirido a través dun Sistema de Renting”, precisan.

O robot, que recibe o seu nome en homenaxe a Leonardo Da Vinci, “é operado polo médico cirurxián, que actúa sobre unha consola e, fóra do campo estéril, manexa un Endoscopio Tridimensional e o instrumental denominado Endo Wrist, cos ollos, as mans e os pés”.

Segundo estes colectivos, “o robot interpreta os movementos do cirurxián e tradúceos en movementos precisos dos instrumentos, superando así as limitacións actuais da cirurxía aberta, con beneficios para o paciente como menos dor e risco de infección, menos risco de complicacións na operación, menos perda de sangue, menores cicatrices, menos estancia hospitalaria, recuperación funcional do paciente”.