O Concello de Lugo destacou a “gran participación” nas festas do San Froilán durante o pasado fin de semana, no que acompañou o bo tempo, con temperaturas por riba dos 25 graos. Este ambiente trouxo consigo unha animación “inédita” nas rúas do centro, explica.
A concelleira de Cultura, a nacionalista Maite Ferreiro, asegurou que están “moi satisfeitos” con este alto nivel de participación que se corrobora cunha porcentaxe de ocupación hoteleira que rozou o cento por cento na cidade das murallas, segundo abundou.
“Estamos moi satisfeitos porque foi un esforzo tremendo o que se fixo desde a área de Cultura, temos que agradecer a implicación de todo o persoal que traballa aquí porque foron un mes de agosto e de setembro moi intensos e todos nós vemos recompensado todos os nosos esforzos logo de ver a gran participación e animación na rúa do fin de semana”, valorou.
O mellor cálculo sobre estas festas que continuarán ata o 12 de outubro, abundou a concelleira, “é o que se pode ver ao andar polo recinto feiral, ou polo centro da cidade, con moita participación, onte con colas nas barracas“.
Tamén destacou a expectación que se produciu con “o desfile do traxe”, ao que asistiron miles de persoas e onde tamén luciron os seus traxes a propia Ferreiro e a alcaldesa, a socialista Lara Méndez.
Ferreiro comentou que, ademais do variado programa con máis de 200 actividades ata o sábado 12, contribuíu que o “fin de semana” houbese “un tempo estupendo onde polo día estábase ben e as noites non foron moi frías”.
“Isto fixo posible que puidésemos ver todos os espectáculos que había organizados en distintos lugares da cidade que estaban a tope. Onte púidose ver grupos de amigos, amigas, familiares que se xuntaron para celebrar o domingo das Mozas. Todo o mundo que chegou a Lugo marchou satisfeito e con ganas de repetir”, comentou.
A festa continúa e está previsto que pase por Lugo Javier Gurruchaga, así como Miguel Costas, Don Patricio, Los Enemigos ou o espectáculo, o mércores 9, de ‘Letras das Festas, Popurrí de orquestras, bises e verbenas’.
