A Garda Civil detivo na localidade de Castroverde a un veciño de Lugo de 47 anos por un delito continuado de roubo. Canda el, tamén se imputou a outro lucense de 28 anos en calidade de investigado. Atribúeselles a presunta autoría de varios roubos no municipio, grazas aos que se terían feito con gasóleo e material agrícola por valor de 4.500 euros.

Os feitos tiveron lugar desde o pasado mes de febreiro, data na que se tivo coñecemento de varios roubos cometidos no termo municipal de Castroverde. Segundo relataron fontes do Instituto Armado, os presuntos autores apropiáronse de gasóleo, ferramentas, útiles agrícolas e material apícola. Todo iso cun valor aproximado de 4.500 euros. O seu modus operandi baseábase en actuar de noite e encapuchados, co fin de non ser identificados.

A investigación continúa aberta e a Garda Civil non descarta máis detidos ou investigados en relación con estes feitos.