O presidente da Deputación, José Tomé, anunciou este mércores a decisión de convocar un Pleno extraordinario para a disolución de Suplusa. Entende que, aínda que foi útil no seu momento, agora é unha entidade desvirtuada polas disfuncións dos últimos anos. Desta maneira, co inicio dos trámites para a súa disolución, daríase o primeiro paso para cumprir un dos puntos centrais do pacto de Goberno entre PSOE e BNG.
Menos dun mes despois da investidura de Tomé, o presidente arranca o procedemento que desembocará na desaparición da Sociedade Urbanística Provincial. Coida que con este movemento se contribuirá a devolver a tranquilidade e a normalidade institucional á Deputación, xa que Suplusa foi motivo de múltiples disputas nos últimos tempos, da man do que foi o seu presidente, Manuel Martínez. O ente provincial retiráralle a condición de medio propio en marzo de 2018, polo que “hoxe a súa existencia carece de sentido”.
PROCEDEMENTO A SEGUIR
Así pois, o proceso comeza co Pleno extraordinario que se convocou hoxe e que se celebrará a principios de setembro. Ábrese, entón, a primeira fase, a de disolución. Quedarán outras dúas: a de liquidación e a de extinción definitiva da entidade e da súa personalidade xurídica.
Co fin de que haxa sintonía na corporación en todo este procedemento, PSOE, PP e BNG asinaron a convocatoria da Xunta Xeral Extraordinaria do ente mercantil para o día 12 de setembro. A orde do día inclúe os seguintes puntos: acordar a disolución da sociedade e a súa entrada en liquidación, así como o desistimento das accións xudiciais interpostas mutuamente (sociedade-Deputación); establecer un período de liquidación de 24 meses, que poderá ser ampliado mediante petición motivada; cesar a todas as persoas administradoras e órganos da sociedade (secretaría, intervención, tesouraría, xerencia e dirección técnica); e designar as persoas que exercerán o cargo de liquidadores da sociedade (os deputados Pilar García Porto, Mónica Freire Rancaño e José Antonio García López).
SITUACIÓN DOS TRABALLADORES
O PP provincial tamén asinou esa convocatoria e, aínda que defenden a xestión de Suplusa, consideran que a súa imaxe se viu “danada” nos últimos tempos como consecuencia “exclusiva” do “incrible conflito político interno” do PSOE. “Participaremos no proceso sempre e cando estean salvagardados os dereitos dos traballadores e dos Concellos”, aseguran nun comunicado.
Respecto diso, o presidente da Deputación afirmou que a corporación ten a vontade de garantir os dereitos laborais dos empregados, para o cal se solicitarán os informes técnicos pertinentes.
“ADELGAZAMENTO” DA DEPUTACIÓN
Dende o organismo provincial, coidan que esta medida supón un avance no proceso de reestruturación, modernización e “adelgazamento” da Deputación, un dos obxectivos do pacto de Goberno. Así pois, lograríase un aforro económico importante.
