Centos de persoas saíron á rúa en Lugo, no acto central convocado polo sindicato CIG con motivo do Primeiro de Maio, e clamaron contra o imperialismo, o aumento do militarismo e a “criminalización” da clase traballadora que cae enferma.
O secretario xeral do sindicato nacionalista, Paulo Carril, lembrou que a lema da mobilización deste ano é ‘Contra o imperialismo, pola paz e pola soberanía. En Galicia, traballo digno e dereitos’.
Así, recalcou que a guerra promovida polo “capitalismo neoliberal” pretende impor a “hexemonía” de Estados Unidos, e agrava a “situación crítica” que xa padecen os traballadores, tamén os galegos. Respecto diso, denunciou que nin a Xunta nin o Goberno central teñen posto en marcha un plan de choque que faga fronte ás consecuencias sociais e económicas da guerra, polo que a clase traballadora “camiña directamente cara ao risco da pobreza”.
En Galicia, denunciou, o PP está “máis preocupado” por “compartir unha axenda con Vox e competir polo voto con Vox” que pola clase traballadora, nun contexto no que se permite que os fondos de investimento expolien os recursos galegos sen que haxa unha reversión cara á sociedade ou cara ao desenvolvemento industrial.
Así mesmo, denunciou a “campaña de criminalización” da Xunta contra as baixas laborais, dentro dunha “deriva autoritaria” do PP, e lembrou que “a saúde é un dereito” e que “enfermar non é un delito”. Igualmente, defendeu os dereitos das persoas migrantes que escollen Galicia para levar a cabo o seu proxecto de vida.
“AUTORITARISMO” E “GOLPISMO”
Paulo Carril lembrou que a CIG trasladou o seu acto central a Lugo (inicialmente estaba prevista a manifestación en Vigo), para denunciar a “carreira de autoritarismo, de golpismo” do PP, coa moción de censura na cidade amurallada.
Para a CIG, esta posición do PP “enmárcase nun contexto onde se quere impor un diálogo social legalizado para desmantelar os órganos tripartitos de representación institucional”. “Un PP que pretende crear organismos institucionais ao seu beneficio, que non cuestionen as súas políticas, que aparta maxistrados do Tribunal Superior de Xustiza de Galicia, que censura aos medios públicos de comunicación e que aínda por encima está agora nunha campaña de criminalización das persoas enfermas”, criticou.
Por todo iso, concluíu, a deste 1 de maio é unha “xornada de loita e mobilización”, porque “está en xogo poder vivir e traballar dignamente” en Galicia. “A mobilización debe ser o camiño”, proclamou e engadiu: “A loita continúa e máis loita que nunca”.
