O PP de Lugo insiste en preguntar ao Goberno central se acometerá a intervención pública de Alcoa San Cibrao, en Cervo, ante a “crecente incerteza” sobre o futuro da factoría.
Nun comunicado, os ‘populares’ criticaron que o Executivo segue sen aclarar se levará a cabo esta intervención, a pesar da ameaza de peche que mantén a dirección da multinacional do aluminio. O senador José Manuel Balseiro explicou que as preguntas formuladas polo PP na Cámara Alta, en maio e xuño, “aínda non recibiron contestación”, a pesar de que o regulamento establece un prazo límite de 30 días para facelo.
Estas iniciativas, segundo dixo, buscan que o Goberno explique se ten previsto cumprir os mandatos parlamentarios que, aprobados por maioría, obrigan ao Executivo a pór “todos os medios ao alcance das administracións” para garantir o futuro dunha factoría “vital” para a economía da Mariña lucense.
O PP censurou a “falta de compromiso” do Executivo de Pedro Sánchez, xa que continúan pendentes dúas medidas “fundamentais” para todo o sector electrointensivo: dispor dun prezo enerxético máis barato e “desbloquear” os parques eólicos de tramitación estatal que deben fornecer enerxía a Alcoa e que “decaeron por estar feitos fóra de prazo”.
