O sector da limpeza da provincia de Lugo está en folga indefinida. A principal causa é a falta de resposta desde a patronal para negociar a renovación do convenio colectivo no sector. Actualmente as táboas salariais son as do convenio de 2019-2021, cunha vixencia finalizada o 31 de decembro de 2021. A actual situación das taboas salariais indica que o Salario Mínimo Interprofesional de 1.080 euros brutos a fin de mes e en catorce pagas, non está reflectido no documento. Isto converte á provincia de Lugo nunha das que non se renovou o convenio da limpeza. Pola contra, o empresariado recorre a elementos que fan elevar as cifras salariais base do convenio de 2021 como por exemplo, a antigüidade.
Así, traballadores da limpeza de edificios e locais da provincia de Lugo saíron ás rúas este martes nunha caravana de protesta convocada polos sindicatos CIG, UGT e CC.OO. na que participaron decenas de vehículos para solicitar a dignificación do sector e “a mellora das condicións laborais”.
No noveno día da folga indefinida iniciada o pasado 16 de outubro, a caravana partiu do edificio sindical de Lugo ás 11.30 horas e percorreu algunhas das principais vías da cidade, como a Rolda da Muralla (onde se produciu o corte dun dos carrís de circulación), a avenida de Ramón Ferreiro e a rúa San Roque; antes de culminar o seu percorrido de novo fronte á casa sindical.
“Non todas as traballadoras dispoñen de vehículo propio, pero como hai vontade de mobilización, aquí estamos. A xente está moi encabuxada, a xente quere seguir ata o final e non hai volta atrás”, manifestou, en declaracións a representante de CIG-Servizos na provincia de Lugo, Asunción Castiñeira. Segundo informou, os sindicatos rexistrarán un escrito ante a Consellería de Promoción do Emprego e Igualdade para denunciar a “discriminación absoluta” de “un sector feminizado”.
“Pedimos á consellería e á Xunta de Galicia, que son os dous principais clientes da privatización da limpeza, que tomen medidas nesta situación”, declarou Castiñeira, para acto seguido subliñar que as mobilizacións do sector da limpeza non cesarán ata que a patronal, a Asociación Profesional de Empresas de Limpeza (Aspel), “sente a negociar” a redacción dun novo convenio.
CONVENIO FINALIZADO EN 2021
En outubro de 2021, tres meses antes da finalización do convenio, envióuselle á Asociación Profesional de Empresas de Limpieza (ASPEL), a solicitude para crear unha mesa de negociación para o futuro convenio do sector. En maio de 2022 constitúese a mesa “aínda que a primeira reunión foi o 27 de xuño de 2022 e ASPEL queda en enviarnos a súa proposta”, apunta José Manuel Brea de CCOO.
A proposta dos e das traballadoras á patronal era un convenio a catro anos cunha suba total do 12% dividida en catro subas anuais consecutivas. “Actualmente o total anual dunha persoa empregada de limpeza é de 13.594,89 euros para a categoría de peón aínda que sumándolle complementos” di Asunción Castiñeiras da CIG. Nalgúns casos, a antigüidade forma parte dese grupo de complementos que compensan a falta da suba no SMI, “e hai xurisprudencia para poder facelo”.
“Non esperaban a suba do SMI, por iso son moi reticentes a negociar e xogan a deixar en branco os anos xa vencidos” di Óscar González de UGT. As estimacións sindicais apuntan a “perdas de 1.800 euros en canto poder adquisitivo por parte de traballadoras e traballadores se a negociación non vai para adiante”.
Coa folga indefinida esperan que a patronal por fin fale sobre propostas. Consideran que a primeira semana de folga é crucial ante as respostas do empresariado, como por exemplo: “dicían que faciamos peticións moi elevadas” di González. A isto último, os sindicatos engaden a posible estratexia do desgaste nos xulgados do social, amais xa saturados.
SERVIZOS MÍNIMOS, PRECARIZACIÓN E FEMINIZACIÓN
A pandemia trouxo, entre outras moitas consecuencias, que as empresas de limpeza fosen declaradas “sector esencial”. Durante esa etapa “gañaron moito diñeiro” e por iso o persoal das empresas non entende a reticencia dos seus xefes a negociar subas salariais. Mais coa convocatoria de folga en Lugo, as empresas tiraron de seren “sector esencial” e reclamaron á Xunta a súa intervención para decretar os servizos mínimos.
“Piden uns servizos mínimos do 100% por seren empresas esenciais, por iso a Xunta e outras administracións poden emitir un decreto declarando cales son os servizos mínimos para unha folga no sector” apunta Asunción Castiñeiras. “Hai moitas empresas traballando en edificios públicos que están levando á precarización dos concursos” di González.
“Os hospitais, a Universidade ou os colexios non están dentro do convenio” apunta Manuel Brea. E se o convenio, en vez de provincial fose autonómico? “Sería positivo porque traería unha unificación das condicións salariais” en toda Galicia.
A precarización, como xa se apuntou, ten un dos seus piares nas rebaixas ofrecidas en concursos públicos. Mais a non renovación salarial leva canda si unha precarización que inclúe a familias monoparentais ou persoas en risco de exclusión. O outro elemento tamén a ter moi en conta, é a feminización deste sector. Se se buscan explicacións, as respostas aluden ao patriarcalismo social, pois existen traballos como limpeza de cristais onde se poden ver máis homes que mulleres.
As táboas salariais no sector da limpeza lugués non se moven desde 2021. O persoal acusa de inmobilismo á patronal ademais de non querer realizar as subas salariais atrasadas. Para esta reportaxe puxémonos en contacto tanto con ASPEL como coa Confederación Empresarial de Lugo (CEL) quen normalmente envía avogados a negociar entre persoal e empresas provinciais. Desde ambas organizacións non quixeron dar resposta ás preguntas deste medio pois consideran que podería interferir nas negociacións.
