A alcaldesa de Lugo, Lara Méndez, acompañada do concelleiro de Urbanismo, Álvaro Santos, anunciaron este luns en rolda de prensa que a cidade, antes de que conclúa o ano, disporá dunha nova ordenanza reguladora para licenzas urbanísticas.
En rolda de prensa, Méndez precisou que se trata dun documento que queren “que sexa o marco normativo de referencia tanto para a administración como para os administrados, harmonizando e unificando criterios que rexerán a tramitación dos títulos habilitantes de obra e actividade no concello”. “Esta medida, xunto coa ordenación previa de persoal sobre a que se traballa, será chave e imprescindible para incrementar a eficacia dos servizos municipais“, resumiu.
Ademais, Méndez apelou á necesidade de facer “unha revisión en profundidade, que permita a adecuación ás normas e disposicións en materia urbanística e medio ambiental e que propicie a axilización dos procedementos e diminuíndo os tempos de resposta“. “Entre os propósitos da ordenanza está fomentar e impulsar a participación cidadá“, esbozou a alcaldesa, que avanzou que se abre un período de 15 días para que se fagan “achegas” por parte dos veciños da cidade.
Pola súa banda, o concelleiro de Urbanismo, Álvaro Santos, puxo o acento en que se busca unha regulación “máis rigorosa e transparente”, ademais de que se aceleren os tempos de resposta. Así, concretou que o pasado ano “foron 4.865” os documentos que se presentaron e 2.990 procedementos, dos que se resolveron “1.929, o que supón máis dun 64 por cento sobre o total”, matizou. Tamén se persegue alixeirar “os prazos” e encaixar as peticións de licenza “o máis próximo” ao tres meses que indica a lei, concluíu.
