EFE | O sector da distribución para hostalería sacou este luns á rúa uns douscentos vehículos de reparto para unha manifestación en Lugo coa que o colectivo —agrupado na asociación Adislugo— pretende reclamar axudas contra os danos ocasionados polas restricións da pandemia.

A manifestación partiu ás 09:00 horas do parque empresarial das Gándaras e pasou polo polígono industrial do Ceao. Desde alí dirixíronse ao centro de Lugo para dar dúas voltas á Rolda da Muralla, onde está situado o edificio administrativo da Xunta de Galicia.

O presidente de Adislugo, Eloy García, comentou que as empresas que a integran dan traballo neste momento a máis de medio milleiro de persoas, ás que hai que sumar os 170 comerciais das adegas e das empresas cervexeiras. Lembrou a EFE que a distribución “depende totalmente do sector da hostalería”, polo que, cos establecementos pechados, a súa actividade está tamén paralizada.

Por iso, dixo Eloy García, o que reclama este sector “son axudas directas e que se manteñan as subvencións para os ERTEs”, co obxectivo de manter os negocios a flote á espera de que se recupere a hostalería.  Tamén reclaman “financiamento” para os seus clientes, de modo que dispoñan de liquidez para facer fronte aos pagos aos seus provedores.

A conto diso, afirman que as empresas de distribución están a pasar por problemas de liquidez, dado que teñen que pagar aos seus provedores “nun prazo curto de tempo”, pero “fíanlle aos clientes” por un período de tempo prolongado.

Aseguran que esta manifestación busca darlle visibilidade á problemática do seu negocio, do que viven “centos de familias” na provincia, e do que “unha boa parte da sociedade non ten constancia”.