EFE | O goberno bipartito do Concello de Lugo sacou adiante hoxe nun pleno extraordinario un “orzamento expansivo” para o ano 2021, que suma máis de 106 millóns de euros, o que supón un incremento do 6,5% en relación co actual exercicio. Buscan, din, a reactivación económica e a xeración de emprego nun tempo marcado pola “crise económica provocada pola crise sanitaria”.
A alcaldesa de Lugo, Lara Méndez (PSdeG), lembrou que o orzamento para o próximo exercicio económico será o máis elevado dos últimos anos, precisamente para responder a unha situación “excepcional” provocada pola pandemia.
DISTRIBUCIÓN DAS PARTIDAS
“A súa finalidade será contribuír a que o municipio saia reforzado da crise social e económica na que está a derivar a pandemia”, aclarou, de modo que da cifra total (106’4 millóns), 31,2 millóns están dedicados precisamente a políticas sociais, mentres que outra partida de 5,3 millóns de euros irá destinada a axudas para “autónomos e emprendedores”. As contas municipais tamén reservan unha partida de case quince millóns de euros para investimentos, o que supón, aclarou, ao redor dun 40% máis que no exercicio en curso.
“A ampliación dos espazos peonís, a creación de novas urbanizacións, zonas verdes, parques infantís, áreas de esparcimento e deportivas, a mellora do patrimonio e da conectividade do municipio, da mobilidade e da iluminación pública, tanto da cidade como da zona rural, son algúns dos aspectos nos que terán incidencia estas contas”, dixo Méndez.
Pola súa banda, o tenente de alcalde, Rubén Arroxo (BNG), valorou que son uns orzamentos “expansivos e necesarios”, porque en momentos de crise económica, as administracións teñen que facer “grandes investimentos”. Arroxo afirmou que o Concello de Lugo non quere caer “nos erros” doutras administracións, que optaron por “retrotraerse” noutros momentos de crises. Co investimento municipal, engadiu, contribúese á “creación de emprego”, á “estabilización do existente” e tamén a mellorar a cidade.
‘NON’ DO PP E C’S
Os dous partidos da oposición, PP e Ciudadanos, votaron en contra das contas presentadas polo bipartito.
De feito, o Partido Popular acusou a PSOE e BNG de “inmorais” por aprobar uns orzamentos que “favorecen a subida dos seus soldos e a compra de coches oficiais de alta gama”. Segundo o portavoz do PP, Ramón Carballo, “o falso progresismo de Méndez e Arroxo” quedou “ao descuberto coa toma destas decisións indecentes en plena pandemia e cando hai moitas familias pasando por graves dificultades para saír adiante”.
Ademais, lembrou que estes orzamentos “incrementan o gasto corrente en 2,5 millóns de euros” e reducen a un “ridículo 15% os investimentos”. Tamén supoñen, dixo, “unha hipoteca para os lucenses a conta do crédito de 7 millóns que van pedir e polo que pagaremos 1 millón de euros de intereses”.
