EFE | A Deputación de Lugo contará cun “investimento extra” de catro millóns de euros, procedentes de fondos europeos, para reforzar as políticas de emprego na provincia, grazas a tres convenios de colaboración asinados coa Escola de Organización Industrial (EOI), que depende do Ministerio de Industria.

O presidente da Deputación de Lugo, José Tomé, asinou hoxe eses convenios co secretario xeral de Industria e da Peme do Goberno de España, Raúl Blanco, que tamén exerce como presidente da Escola de Organización Industrial. Na firma do convenio, que se realizou de forma telemática, tamén participou o deputado de Promoción Económica e Social, Pablo Rivera, e a directora xeral da Fundación EOI, Nieves Olivera.

Os proxectos promovidos por ambas as institucións a través destes acordos contan cun orzamento conxunto de 4.112.207 euros, un investimento da que se fará cargo ao 85,4% a Escola de Organización Industrial, a través do Fondo Social Europeo, mentres que a Deputación de Lugo achegará o 14,1% restante.

As accións que contempla o convenio van dirixidas a 775 pemes e autónomos de Lugo, 250 parados de longa duración e 600 mozos. O seu obxectivo é a reactivación e o apoio aos sectores e colectivos sociais máis afectados pola crise económica derivada do covid-19.