O comercio da rúa do Progreso, en Lugo, sae á rúa os ‘Supermércores’. Así se chama a iniciativa a través da cal o Concello e a asociación Lugo Monumental colaboran para apoiar os negocios desta céntrica vía durante o Nadal.
En vista do éxito obtido pola actividade dos “Supermartes” organizada na rúa da Raíña durante o mes de outubro e novembro, agora preténdese seguir a mesma liña noutros puntos da cidade. Cada mércores, os establecementos adheridos á iniciativa colocarán stands cos seus produtos na rúa e ofrecerán descontos e promocións aos clientes.
10.000 EUROS EN PREMIOS
Por outra banda, a Deputación de Lugo e a Federación de Comercio asinaron un convenio de colaboración polo cal o ente provincial destina 52.000 euros á entidade para a campaña ‘Este Nadal, o comercio de Lugo máis preto de ti. Comercio de Lugo Seguro, Nadal Seguro’.
O proxecto procura incentivar as compras nos comercios de proximidade da provincia a través de premios por un valor total de 10.000 euros. O presidente da Deputación, que sostivo que esta colaboración sempre foi “importante”, destacou que este ano é “fundamental e imprescindible” polo forte impacto da crise sanitaria e económica.
