Os hostaleiros galegos secundarán mobilizacións contra o peche do sector e para esixir axudas ante as novas restricións da Xunta en 60 concellos. Lugo será unha das cidades que acolla estas protestas, segundo confirman dende a Asociación Provincial de Empresarios de Hostalaría de Lugo.
A manifestación está prevista para o vindeiro sábado, ás 11:00 horas. O presidente da Apehl, Cheché Real, avanzou que acudirá “todo o sector da distribución da provincia de Lugo, tamén directamente afectados” por unhas medidas que obrigan ao peche do sector dende este venres ás 15:00 horas.
Real queixouse de que “se cargue” contra a hostalaría “cando todos os informes oficiais que nos chegan din que os contaxios en cafetarías, restaurante e outros locais non pasan dun 3 ou 3,5%“, apuntou en liña co expresado por outros representantes deste sector. “Non entendemos esta inquina coa hostalaría”, lamentou.
Fronte á baixa porcentaxe nos negocios de hostalaría contrapón o que ocorre nas reunións familiares ou de amigos, con niveis de contaxio do 18%. “En reunións fora do ámbito da hostalaría é onde se disparan os contaxios”, argumenta.
Por outra banda, incide en que desde a hostalaría se investiu “en medidas de protocolo hixiénico sanitarios” que agora “non valen para nada”. Neste contexto, Cheché Real defendeu a necesidade de que se fixen criterios con “un pouco de sentido común coa economía, porque dependen diso moitas familas”.
Podes ler a información completa no Galicia Confidencial.
