O presidente da Asociación Provincial de Empresarios de Hostalaría de Lugo, Cheché Real, fixo este luns un chamamento á “insubmisión fiscal” ante a falta de axudas no sector para afrontar a pandemia pola Covid-19.
“Estamos cabreados, estamos cansos, estamos indignados porque se están cargando as tintas contra un sector que é un exemplo de cumprimento da normativa e os protocolos hixiénico sanitarios. Séguense cargando de medidas restritivas e limitacións pero non chega ningunha axuda”, manifestou.
“Seguimos pagando as cotas á Seguridade Social, o IRPF, seguimos pagando as hipotecas, a luz, a auga, seguimos pagando todo tipo de cotas e isto é inasumible e condúcenos ao sector da hostalaría a unha ruína inmediata“, destacou.
Por todo iso, chama a “a insubmisión fiscal”, dado que “non” poden “seguir pagando impostos” cando “non” lles “deixan traballar”. Reivindica a seguridade dos locais hostaleiros e lembra que os datos oficiais sitúan “en torno ao 3%” a transmisión do coronavirus neste sector, unha porcentaxe moi inferior á que se dá no transporte, oficinas públicas ou reunións familiares e de amigos.
UN PECHE SEN TEMPO PARA PREPARARSE
Ademais afeou o que ocorría o venres co peche impulsado pola Xunta nas sete grandes cidades galegas, cuxo aviso chegou apenas tres horas antes de entrare en vigor. “As reservas xa estaban feitas, as mercadorías compradas. Non nos respectan o máis mínimo”, lamentou.
