A Deputación de Lugo priorizará nestes momentos “o pago a provedores” para tratar de “paliar os efectos económicos” que está a provocar “a crise sanitaria do coronavirus”, segundo informou o presidente provincial, José Tomé.e
“Unha das liñas de traballo que estamos a intensificar durante o estado de alarma é o pago a provedores”, engadiu, para “inxectar liquidez nas empresas e contribuír desa forma a que poidan pagar os salarios dos seus traballadores e os gastos correntes”.
“Somos conscientes de que na nosa provincia a gran maioría do tecido empresarial son pemes, micropemes e autónomos”, engadiu, polo que o goberno provincial quere “axudar na medida das súas posibilidades” a que “poidan manter o persoal e a súa actividade”.
Aínda que a maioría do persoal está a traballar a distancia e os efectivos presenciais “reducíronse ao mínimo imprescindible”, Tomé asegurou que desde a institución provincial están a implementarse medidas para que o “impacto desta crise sexa o menos duro posible”.
