O goberno bipartito da Deputación de Lugo sacou adiante este xoves un orzamento para o ano 2020 que ascende a 91,7 millóns de euros, unha cantidade cuxo 33 % irá destinado a políticas sociais, 20 millóns de euros ao Plan Único de axudas aos municipios e outros 14 millóns a mantemento, conservación e obra nova na rede viaria provincial que, con 4.200 quilómetros de estradas, é a máis extensa de España.

Socialistas e nacionalistas, que forman un goberno bipartito con maioría absoluta no pleno da Deputación de Lugo, aprobaron cos seus votos o orzamento da Deputación, mentres que o grupo provincial do Partido Popular optou neste caso pola abstención.

Se non hai reclamacións no período de exposición pública a partir da súa publicación no Boletín Oficial da Provincia, as contas podería quedar definitivamente aprobadas antes de que finalice o ano e o período de execución do orzamento comezará no mes de xaneiro, co que o goberno bipartito terá cumprido o seu “compromiso”, dixo o presidente da institución, José Tomé.

Con todo, para a portavoz do grupo provincial do PP, Elena Candia, estes orzamentos “chegan tarde” e foron aprobados xa de forma “extemporánea”, porque se esperaba maior “traballo” dun goberno que lle custa aos lucenses “un 30% máis2 que o anterior. Candia lembrou que os populares sempre defenderon que un goberno ten que ter “medios” para traballar, pero tamén ser eficaz no cumprimento das súas funcións.

Tomé aclarou que o orzamento da Deputación de Lugo para este ano é un 3,7% superior ao do exercicio en curso, grazas a un incremento da participación nos tributos do Estado. Precisou, así mesmo, que reflicten a decisión de disolver a Sociedade Urbanística Provincial (Suplusa), de modo que se elimina a achega da Deputación, aínda que as contas si inclúen a achega da institución ao orzamento do Consorcio Provincial de Bombeiros.

A Deputación destinará máis de 20 millóns de euros, 11,2 millóns do orzamento deste ano e o resto da cantidade con cargo aos remanentes do exercicio de 2020, para o Plan Único de axuda aos municipios, así como 14 millóns de euros para a rede viaria provincial, outros 2 millóns para impulsar o sector primario e 2,4 millóns para promoción turística.

Así mesmo, resérvase unha partida de 9 millóns de euros para o funcionamento das tres residencias da terceira idade abertas, en Pol, Trabada e Ribadeo, así como para a apertura das construídas na Fonsagrada, Castroverde e Pedrafita do Cebreiro.

Cinco millóns irán destinados a iniciativas para fomentar a creación de emprego e 2,6 millóns para mellorar a educación pública na provincia.

“Elaboramos uns orzamentos apegados á realidade da provincia, que aplican, a través da cooperación cos concellos, políticas progresistas para favorecer a cohesión social, o equilibrio territorial e o impulso da economía e o emprego”, subliñou José Tomei.

Pola súa banda, Efrén Castro, portavoz do grupo provincial nacionalista, afirmou que estes orzamentos levan tamén a marca do BNG, a través do Plan Único de axuda aos concellos, pero tamén pola introdución dunha perspectiva de xénero nas contas provinciais desde un punto de vista transversal. EFE