A Policía Nacional detivo a oito persoas nas provincias da Coruña (un), Lugo (tres) e León (catro) pola súa suposta participación nunha pelexa tumultuaria en Lugo antes dun partido de fútbol. Segundo informou este sábado corpo nacional, os feitos producíronse o pasado 2 de abril, coincidindo coa celebración do partido entre o CD Lugo e a SD Ponferradina, correspondente á xornada 34 da Segunda División da liga. Os arrestados pertencen aos grupos ultra radicais das Brigadas Lucenses e da Fronte Norte.
En concreto, horas antes do arranque do partido, produciuse un enfrontamento entre afeccionados de ambos os clubes, cunhas 40 persoas implicadas que se agrediron mutuamente propinándose patadas e puñadas. Ademais, a Policía sinala que se lanzaron botellas e mobiliario hostaleiro. A intervención dos axentes permitiu o control da situación e a identificación dos participantes.
As xestións practicadas con posterioridade puideron determinar a pertenza dos implicados na pelexa aos grupos ultras e violentos coñecidos como Brigadas Lucenses e Fronte Norte. A Policía Nacional sinala que estes grupos, de ideoloxía política contraria e historicamente enfrontados, utilizan habitualmente o escaparate do deporte como escusa para levar a cabo condutas violentas, co risco que iso implica para as persoas, os danos nos bens, e a alteración da orde pública.
Tras a posta a disposición xudicial dos detidos, decretáronse medidas cautelares de afastamento así como prohibición de entrada aos estadios de fútbol para todos eles. Na investigación, dirixida polo Xulgado de Instrución número 1 de Lugo, participaron axentes da Comisaría Xeral de Información, as Brigadas Provinciais de Información de Lugo, A Coruña, Pontevedra e Madrid e a Brigada Local de Información de Ponferrada. A operación enmárcase dentro da estratexia de “tolerancia cero” que a Policía Nacional mantén contra a violencia no ámbito dos eventos deportivos.
REFORZO CON MOTIVO DO PARTIDO DESTE DOMINGO
Ademais, a Policía Nacional informou de que, con motivo da celebración do partido entre o C.D. Lugo e o S.D Ponferradina na cidade da muralla este domingo, reforzarase o dispositivo de seguridade elaborado para detectar e evitar altercados entre radicais. O evento deportivo foi declarado como de “alto risco”.
