O Cafés Candelas Breogán perdeu na derradeira xornada da Liga Endesa contra San Pablo Burgos no Pazo dos Deportes de Lugo (76-95). Os lucenses remataron a tempada coma colistas con nove vitorias despois de seis derrotas consecutivas.
Burgos estivo sempre por diante no marcador. Cos 10 puntos de Vlatko Cancar, 7 de Paul Zipser e 4 de Branden Frazier remataba o primeiro cuarto cun Breogán sen ningunha asistencia e xa 6 pérdidas ao remate dos primeros 10 minutos dobrando aos galegos no marcador (12-24).
Despois dunha tripla de Javi Vega, Burgos acadaba a máxima vantaxe (24-38). Respondía Breogán cun parcial de 12-5 coa dirección de Christian Díaz e o poderío interior de Volodymyr Gerun para chegar ao descanso cun esperanzador 36-43.
No terceiro cuarto, os lucenses chegaron a colocarse a 2 puntos (45-47), pero dende aí Burgos volveu poñer a quinta marcha e, con dúas triplas de Cancar, estirando a renda (54-67). Cunha canastra do aleiro estonio Robert Valge remataba o partido coa máxima vantaxe de San Pablo Burgos (76-95), que, con esta vitoria, remata undécimo e competirá na Basketball Champions League.
Afeccionados breoganistas ovacionaron a Christian Díaz e Emir Sulejmanovic´pedindo as súas continuidades, así coma berros de “MVP” a Volodymyr Gerun.
Gerun foi mellor breoganista con 15 puntos e 11 rebotes, seguido por Christian Díaz, con 11 puntos, 6 rebotes e 3 asistencias.
