O director galego Brais Revaldería, natural de Lugo, presentará en Estados Unidos o seu proxecto ‘Fillos do Vento: A Rapa’, unha proposta inmersiva centrada na Rapa das Bestas de Sabucedo, na Estrada.
A obra celebrará a súa estrea en Norteamérica dentro do festival SXSW 2026, que se celebra en Austin (Texas), tras pasar previamente por Cannes e Sevilla. A peza foi seleccionada na categoría oficial XR Experience Spotlight e poderá verse do 15 ao 17 de marzo no Fairmont Hotel da cidade texana.
Con esta nova parada internacional, o proxecto consolida o seu percorrido exterior despois de ser un do tres traballos nomeados na súa sección no Festival de Cannes, onde tivo o seu premiere internacional no Marche du Filme en 2025. Posteriormente foi presentada en España no Festival de Cinema Europeo de Sevilla.
‘Fillos do Vento: A Rapa’ é o resultado de sete anos de gravacións consecutivas nas montañas de Sabucedo. Revaldería, que conta con dous premios Emmy pola súa colaboración con HBO en producións como Westworld e Game of Thrones, documentou durante todo ese tempo una das tradicións máis singulares de Europa.
A Rapa das Bestas, con máis de cinco séculos de historia documentada e recoñecida como Festa de Interese Turístico Internacional, mantén vivo un ritual comunitario no que os veciños conducen aos cabalos salvaxes desde o monte ata o curro para marcalos, desparasitarlos e cortarlles as crines, nunha práctica transmitida de xeración en xeración.
Lonxe de exporse como unha longametraxe convencional, a obra adopta un formato inmersivo con proxección panorámica de 270 graos, imaxe en 8K e son ambisónico espacializado, ao que se suma un sistema de difusión aromática que recrea os cheiros da contorna natural galego. O material visual procede integramente de gravacións documentais reais realizadas en distintas edicións da Rapa, sen recreacións nin imaxes xeradas dixitalmente.
Desta forma, a experiencia sitúa ao espectador no centro da acción, desde a baixada ao monte ata o desenvolvemento do curro, e propón unha mirada contemporánea sobre cuestións como a identidade, o territorio e os cambios culturais no ámbito rural, nun contexto no que xorden novos debates como a implantación de parques eólicos na paisaxe tradicional.
O proxecto conta coa codirección e produción artística de María Fernanda Ordoñez Morla, mentres que a produción executiva está en mans de Pedro Revaldería, de Evernia Media. A produción corre a cargo de Cinexin Studios, coa colaboración de equipos técnicos de España, Estados Unidos e Latinoamérica.
A iniciativa recibiu o respaldo da Xunta de Galicia, a Deputación de Pontevedra, o Concello da Estrada e o Consulado Xeral de España en Nova York, e está vinculada a 100 Sutton Studios, firma con sede en Nova York e Galicia fundada polo propio Revaldería e especializada en narrativa inmersiva e proxectos XR de proxección internacional.
