A área de Cultura do Concello de Lugo fixo pública esta mañá de luns unha nova ampliación da programación das festas de San Froilán 2025, que se celebrarán entre o 4 e o 12 de outubro.
O tenente de alcalde de Lugo, Rubén Arroxo, e a concelleira de Cultura, Turismo e Promoción da Lingua, Maite Ferreiro, destacaron a presenza de varios artistas nacionais e internacionais como Cristina Branco, Dakidarría, Queralt Lahoz ou O Pony Pisador, que se suman a Tanxugueiras, Xoel López ou Lia Kali, que xa estaban confirmados. “Trátase dun cartel que combina tradición e vangarda, voces consolidadas e propostas emerxentes”, sinalou a edil nacionalista.
Pola súa banda, Arroxo subliñou que o San Froilán “non é só un calendario de concertos, senón unha oportunidade para mostrar a identidade cultural de Lugo e pór en valor a cidade como capital da música e a convivencia. Queremos que veciñas e visitantes vivan a festa como unha experiencia colectiva na que se unan música, gastronomía e tradición”.
O cartel de San Froilán 2025 queda configurado así cos xa confirmados Tanxugueiras, Xoel López, Lia Kali, Consorcio, Guadi Galego, Biznaga, Bala, Beira Fauna, Patáx e Lucía Pérez. A eles súmanse Dakidarría, Queralt Lahoz, Cristina Branco, Irmaus dá Raia Seca, Germán Díaz, O Niño, SonDeSeu, Uxía, Nogen, Anxo Araujo, O Pony Pisador, Abril, De Ninghures, Mocho Gris, Loita Amada, Festikultores e Duendeneta.
Ferreiro engadiu que a programación aposta pola incorporación de bandas e proxectos de distintos puntos de España e mesmo de Portugal, o que enriquece o diálogo cultural. “É fundamental dar espazo a artistas galegos como Dakidarría ou De Ninghures, que traballan a nosa música desde unha perspectiva contemporánea, pero tamén abrirnos a propostas como as de Queralt Lahoz ou Nogen, que achegan novas linguaxes”, explicou.
Ferreiro concluíu que esperan que tanto a cidadanía como os visitantes “sintan as festas como propias, gozando non só dos concertos nas prazas Horta do Seminario, Santa María e Mosqueira, senón tamén da animación de rúa e das actividades nos barrios”.
Arroxo lembrou, ademais, que aínda quedan por confirmar novos concertos, pasacalles e actuacións de orquestras que se darán a coñecer nas próximas semanas e que completarán un programa con máis de 200 actividades.
