O Diario Oficial de Galicia publicou este venres a resolución de incoación para declarar como Ben de Interese Cultural (BIC) do patrimonio inmaterial a Ofrenda do Antigo Reino de Galicia. Segundo explican nun comunicado, á hora de elaborar o expediente, que supón a súa protección patrimonial inmediata, os técnicos da Xunta tiveron en conta que se trata dunha manifestación “singular” da comunidade e dunha de “as poucas tradicións vivas que evocan a entidade política histórica de Galicia”. A incoación valora tamén que se manteña de forma ininterrompida durante máis de tres séculos e medio, “reflectindo o carácter de unión do pobo galego” e que constitúe “un feito único dentro das poucas manifestacións inmateriais vivas”.
Anualmente, o domingo seguinte ao Corpus Christi ten lugar en Lugo un acto institucional e relixioso no que participan os mandatarios das antigas capitais do Reino de Galicia: A Coruña, Lugo, Ourense, Santiago de Compostela, Mondoñedo, Betanzos e Tui. Trátase da ofrenda ao “Santísimo” e a súa posterior procesión pola cidade, coa que se cumpre co voto solemne feito en 1669, ante as dificultades económicas da Catedral de Lugo, de dotala dunha renda anual coa que iluminar o Altar Maior.
Dende 1925 ata a actualidade, destacan, o rito da Ofrenda celébrase da mesma maneira, nunha misa solemne na que participan por quendas rotatorios anuais os representantes municipais do sete cidades. Ademais, entre as tradicións litúrxicas, unha banda de gaiteiros interpreta a Marcha Solemne do Antigo Reino de Galicia con gaitas en tres tonalidades e percusión.
Na resolución recóllese que a ofrenda “se adapta á perfección” á definición que da a Unesco para salvagárdala do patrimonio cultural inmaterial “ao reflectir un uso ou expresión que un grupo de individuos recoñece como parte integrante do seu patrimonio cultural, transmitíndoo de xeración en xeración, sendo celebrada constantemente por unha comunidade, supondo unha interacción coa súa historia e difundindo un sentimento de identidade e continuidade”.
