A Real Academia Galega (RAG) trasladou o seu fondo pesar pola morte do académico e investigador literario Arcadio López-Casanova, “unha das voces destacadas da renovación da poesía do último terzo do século XX e autor de traballos imprescindibles sobre estilística que abarcan escritores esenciais da historia das letras galegas”, remarca a institución académica.

O académico de honra, nacido en Lugo no ano 1942, vivía na Comunidade Valenciana desde o ano 1968, onde se instalou tras aprobar as oposicións de catedrático de instituto de lingua e literatura españolas. Desde 1986 era profesor da Universidade de Valencia, institución da que foi nomeado catedrático emérito tras a súa xubilación.

Da súa traxectoria, a RAG destaca que, como creador, deixa libros como ‘Mesteres’ (1976), “obra fundamental na renovación da poesía do seu tempo”. Por outra banda, subliña que, a pesar de que deixou Galicia para instalarse en Valencia, non deixou nunca “de cultivar a lingua galega como poeta e como investigador do feito literario”.