O Concello de Friol informa da suspensión da IV edición do Friulio, a festa castrexo-romana que estaba previsto celebrarse na vila os días 9 e 10 de maio. Á vista da evolución da crise sanitaria, o goberno local e a Asociación de Recreación Histórica A Castronela entenden que “non sería prudente nin responsable” seguir adiante con este evento multitudinario, que mesmo pode reunir unhas dez mil persoas.
A decisión foi tomada tras unha reunión telemática entre o alcalde do municipio, José Ángel Santos, e membros da xunta directiva de A Castronela, encabezada por José Antonio Viña. “Seguro que os veciños de Friol e o resto de persoas que tiñan en mente asistir a este evento, que cada vez recibe maior número de visitantes, entenden que se tome esta medida polo ben común e para tratar de preservar o estado sanitario do municipio”, trasladan dende o Concello.
Tanto a Asociación de Recreación Histórica A Castronela como o equipo de goberno admiten ser “coñecedores da importancia do Friulio para a poboación do municipio”, pero cren que unha situación extraordinaria como a actual require actuar “dende a responsabilide e con coherencia”. “O prioritario é reducir ao mínimo calquera posibilidade de contaxio do virus”, comenta o alcalde.
