O Concello de Vilalba desvelou onte, 8 de xaneiro, as imaxes gañadoras do I Concurso de Fotografía ‘Nadal en Vilalba’. Miriam López Novoa, Rocío Arnesto Prestes e Ana Paredes Rodríguez fixéronse cos galardóns -que incluían unha dotación económica- grazas a unha instantáneas que representaban o significado do Nadal.
Familia, amizade, fogar, soidade, compaña, agasallos, símbolos, paisaxes, pobo, pertenza, lugares… Estas festas evocan emocións diferentes a cada persoa. Dende o Concello de Vilalba, e a través da súa Concellería de Cultura, animaron a que os veciños plasmaran eses sentimentos nunha fotografía.
A imaxe ‘Desexa soñando’, de Miriam López Novoa, alzouse co primeiro premio (200 euros). Rocío Arnesto gañou o segundo premio (150 euros) coa súa foto ‘A xeada que anuncia o fogar’ e, finalmente, Ana Paredes venceu na categoría de Facebook (premiada con 100 euros) grazas á súa instantánea ‘Pelucidades’.
O xurado que vén de emitir o fallo estivo composto por Beatriz Souto Díaz, de familia de fotógrafos, especializada en fotografía artística e publicitaria; Yolanda Purriños, de Purriños fotógrafo; e Raquel Anido, fotógrafa e realizadora en audiovisuais, especializada en vídeo e montaxe.
