A Xunta de Galicia impulsa a creación do chamado Museo da Diocese de Bretoña, no municipio lucense da Pastoriza, que abrirá as súas portas na planta baixa dun edificio histórico, a Casa de Galocha, reformada para acoller unha exposición permanente sobre a antiga sede episcopal Britoniensis, predecesora da actual Diocese de Mondoñedo-Ferrol.
O delegado territorial da Xunta de Galicia, José Manuel Balseiro, visitou este xoves estas instalacións, acompañado polo alcalde da Pastoriza, Primitivo Iglesias, e un grupo de alumnos do colexio da localidade, para “comprobar o resultado das obras de reforma”.
A Xunta de Galicia realizou un investimento de 64.200 euros, aínda que Balseiro confirmou que ese orzamento inicial vai destinado á primeira fase, a que permitirá a apertura do centro expositivo, porque haberá unha segunda na que o goberno galego “seguirá colaborando” para rehabilitar por completo a antiga Casa da Galocha.
A Consellería de Medio Rural financiou o 76% do custo de intervención a través do Grupo de Desenvolvemento Rural (GDR) Terra Chá. “Este museo é un bo exemplo do tipo de investimentos non produtivos que queremos impulsar a través dos GDR, proxectos que dinamizan o medio rural, protexen o noso patrimonio e crean riqueza”, dixo Balseiro. EFE
