O conselleiro de Cultura e Turismo, Román Rodríguez, foi o encargado de pronunciar este domingo o pregón da XLIX Festa da Augardente ‘Camiño de auga e soños’ da localidade lucense de Portomarín, nun acto onde foi nomeado da Orde da Alquitara e destacou a importancia da cultura popular.
Durante a súa intervención, o conselleiro debullou a receita da augardente facendo referencia ao Camiño de Santiago e destacou “a importancia deste produto gastronómico como parte fundamental da cultura popular galega”.
Neste sentido, Rodríguez aludiu ao ingrediente principal, o bagazo, “procedente das uvas cultivadas nestas terras da Ribeira Sacra, de viticultura heroica e desde hai uns días, candidata a Patrimonio Mundial da Unesco”.
Así mesmo, subliñou o labor da localidade lucense que, ao seu xuízo, “é todo un referente do aproveitamento socioeconómico da ruta xacobea”.
“Estamos ás portas do Xacobeo 2021, e Portomarín é un gran exemplo da nosa mellor tradición hospitalaria e da gran riqueza que xera o Camiño de Santiago”, sentenciou o titular de Cultura.
