O Instituto Xeográfico Nacional (IGN) rexistrou durante o mediodía deste luns un terremoto de magnitude 2.9 con epicentro entre Baleira e Navia de Suarna, preto da Cruz do Restelo. O movemento de terra foi orixinado a tres quilómetros de profundidade.
O tremor produciuse algo antes das tres da tarde, segundo datos do IGN, e chegou a sentirse en localidades próximas, como Castroverde. Nun primeiro momento, os cálculos situaban o epicentro do terremoto no concello de Baleira, pero unha revisión posterior indicaba que o punto da superficie onde se producira xa pertence ao termo municipal de Navia de Suarna.
Este organismo pón a disposición da cidadanía un cuestionario macrosísmico para recompilar información máis precisa sobre o sismo e sobre os lugares onde se sentiu.
