O polideportivo municipal de San Román de Cervantes viviu este xoves o balbordo incesante da mostra tradicional de oficios, xogos e gastronomía. A sétima convocatoria do Encontro de Artesanía reeditou un dos principais reclamos turísticos da vila, que presumiu de identidade e atractivo a través dos seus produtos artesáns e os deportes de sempre.
A cita foi organizada un ano máis pola ANPA de Cervantes, presidida por Isabel Calvete, xunto co propio Concello, representado polo rexedor Benigno Gómez Tadín, e co auspicio da Deputación de Lugo, presente no evento a través da deputada de Cultura, Pilar García Porto.
A delegación provincial contribuíu cun investimento de 1.000 euros a prol da actividade económica e a tradición da Montaña, e levou á feira unha demostración de forxa en vivo. Esta iniciativa corresponde ao Centro de Artesanía e Deseño (CENTRAD), que co apoio da Deputación achega recreacións a once concellos da provincia durante o mes de agosto. Nesta ocasión, contou coa participación do artesán Víctor Uriz Carreiro.
Ademais de amosar as claves identitarias e a diversidade de reclamos turísticos, a mostra de Cervantes tivo por motivo a reivindicación e defensa do ensino público nos Ancares, inquedanza da Asociación de Nais e Pais da localidade.
En clave gastronómica ofreceuse o produto sobranceiro do lugar, coma o mel, o embutido ou o pan. No referido aos oficios artesanais, alén da forxa e a malla, ensinouse a traballar a cerámica, coiro, ou o tear. A estas actividades engadíronse os obradoiros de fotografía, deseño, pintura, arte urbana e música, xunto coa modalidade deportiva do VIII Aberto de Billarda do Urogalo.
Para a deputada de Cultura, a cita supuxo unha ocasión “para dinamizar a economía local e a produción artesá”, amais dun “bo escaparate para coñecer esta paraxe”. Pola súa banda, o alcalde agradeceu o apoio das entidades participantes no VII Encontro de Artesanía de San Román de Cervantes, “que segue medrando pouco a pouco” e axuda a espallar a historia do lugar, que cualificou de “enclave único”.
