O Pazo de San Marcos, sede da Deputación de Lugo, acollerá este luns a presentación do libro ‘Árbores e formacións senlleiras da contorna dos Ancares e do Courel‘, elaborado polo catedrático da Escola Politécnica Superior de Enxeñaría da Universidade de Santiago de Compostela (USC), Antonio Rigueiro.
O acto será ás 19,30 horas no salón de actos do pazo e será aberto ao público, de modo que poderán asistir gratis todas aquelas persoas interesadas en coñecer de primeira man esta nova publicación na que colabora a Deputación. Esta obra inclúese nas monografías do Instituto de Biodiversidade Agraria e Desenvolvemento Rural (Ibader), no marco da serie ‘Cadernos da Estación Científica do Courel’ que edita a USC.
O libro ofrece información detallada das 12 árbores e formacións incluídos na actualidade no catálogo galego de árbores singulares, dúas das cales foron recentemente descatalogadas, así como oito que se consideran merecedores de formar parte do listado –tres xa propostos–.
Ademais, no último apartado inclúense 16 exemplares non documentados ata o momento como sinal inequívoco de que “cun traballo de campo máis exhaustivo novas árbores e formacións singulares serían atopados nestas terras”, destaca a Deputación.
