EFE – A Garda Civil investiga o roubo perpetrado a pasada fin de semana na nave ubicada canda o mercado gandeiro de Palas de Rei, propiedade do Concello. Os ladróns levaron do interior unha furgoneta do parque móbil municipal e diversas ferramentas mecánicas. O montante subtraído acada os 20.000 euros.

En declaracións á axencia Efe, o alcalde Pablo Taboada explicou que os asaltantes forzaron a porta de entrada á nave, e que o roubo non foi descuberto ata o luns pola mañá, cando accederon os operarios municipais.

Consta a falta de cinco desbrozadoras, dúas motoserras, un soprador e un martelo pneumático. Esta maquinaria usada en varias campañas está valorada polo Concello en 7.000 euros. Xunto coa furgoneta, a perda estimada é de 20.000 euros.

Así o confirmou o rexedor, quen explicou que o roubo non suporá un gasto de reposición para o Concello. Será a compañía aseguradora a que asumirá o custe.