A Deputación de Lugo aprobou a adxudicación de 19 dos 24 lotes nos que se divide o contrato para o desbroce de 4.200 quilómetros da rede viaria provincial. En concreto adxudicáronse os traballos de roza en estradas de 55 concellos da provincia, por un importe de 1,7 millóns de euros.
En canto aos 5 lotes restantes, que afectan a 12 concellos, a previsión é que se aprobe a adxudicación na Xunta de Goberno na vindeira semana. Estes traballos, que mellorarán a seguirdade e a comodidade dos condutores, comezarán neste mes.
“En total destinaremos á roza de estradas provinciais máis de 2,5 millóns de euros, un investimento moi importante, que responde ao compromiso da Deputación de Lugo de mellorar a seguridade na rede viaria provincial, evitando que a vexetación dificulte a evacuación das augas de escorrentía ou afecte á seguridade dos usuarios”, explicou a voceira socialista do Goberno, Pilar García Porto.
OUTRAS INICIATIVAS PARA A MELLORA DAS ESTRADAS
A Xunta do Goberno tamén aprovou o proxecto de licitación de novas obras para a mellora da estrada LU-P-5705, entre o concello de Sarria e O Páramo, cun investimento de preto de 90.000 euros.
Por outra banda, a Deputación tamén acordou licitar o contrato para a adquisición dunha pá cargadora de rodas para realizar a limpeza da calzada. Este vehículo incorporarase á maquinaria do Parque Móbil da Deputación
