O PSOE de Rábade impugnou o censo electoral do concello para as próximas eleccións municipais ante o incremento de residentes “significativo” e “inxustificado”.Tras facer o propio para as eleccións xerais, os socialistas tomaron esta decisión despois da advertencia da Oficina do Censo Electoral ao Concello de Rábade polo aumento de potenciais votantes durante o mes de xaneiro deste ano.

O secretario xeral da agrupación socialista en Rábade, Miguel Vilar, remarcou que actúan para “protexer a limpeza do proceso“, “tras a anulación de 15 posibles votantes en Rábade por parte da Oficina do Censo Electoral para as eleccións xerais e o sospeitoso aumento do censo durante o mes de xaneiro”.

Neste sentido, Vilar espera que se dite resolución e se ordenen as rectificacións pertinentes no censo de Rábade para as municipais con base nos resultados dos informes e inspeccións.

Hai unhas semanas tamén o actual rexedor, o independente Francisco (Kiko) Fernández Montes anunciou que ía impugnar o censo tras detectar tamén un aumento inxustificado no censo.