O Concello de Lugo está a preparar a intervención necesaria para reparar a avaría detectada na avenida da Coruña, á altura do número 224, onde a existencia dun afundimento na calzada fixo necesario realizar distintas comprobacións nas redes municipais para determinar a orixe do problema.

Nunha primeira fase, os equipos técnicos inspeccionaron a rede de saneamento e realizaron a limpeza dos pozos da zona mediante un camión succionador. Unha vez descartada esta infraestrutura como causa da incidencia, as comprobacións centráronse na rede de abastecemento. Tras verificar que a rede auxiliar que dá servizo directo aos abonados non presentaba fugas aparentes, os traballos dirixíronse á condución xeral de transporte, cun diámetro de 500 milímetros.

Para localizar a fuga evitouse realizar un corte xeralizado de auga que podería afectar a boa parte da zona norte da cidade. Para iso, empregáronse equipos especializados de detección, entre eles rastreadores, localizadores e xeófonos, que permitiron prelocalizar o punto da incidencia sen interromper de forma masiva o subministro.

Na actualidade, o Concello está coordinando os preparativos da reparación e a dispoñibilidade do material específico necesario para acometer unha intervención destas características. A planificación busca reducir na medida do posible as molestias á veciñanza, aos establecementos comerciais e ás persoas usuarias dunha das principais vías de entrada e saída da cidade.