Os Orzamentos da Xunta de Galicia para o ano 2027 avalan o modelo de cidade que impulsa o goberno local de Lugo, segundo destacou a alcaldesa da cidade, Elena Candia. Este modelo baséase en dous eixes fundamentais: as infraestruturas e o investimento nas persoas.
Candia puxo o foco no traballo desenvolvido polo goberno municipal para desbloquear proxectos, impulsar a súa tramitación e avanzar cara á súa materialización. A rexedora sinalou literalmente: “conseguimos desbloquear proxectos que aparecían de maneira consecutiva en exercicios orzamentarios anteriores que pola inacción do goberno anterior non avanzaban”. Neste sentido, citou actuacións como as obras de ampliación da protectora de animais, o parque canino de Fontiñas, o inicio das obras da Serra de Meira, o avance do proxecto de abastecemento e saneamento de Esperante, así como os pasos dados para impulsar o futuro centro de saúde do Sagrado Corazón, onde se prevén 600.000 euros para contratar o seu proxecto nos terreos que xa son de propiedade municipal.
Infraestruturas para que Lugo avance
No ámbito das infraestruturas e dos servizos municipais, os orzamentos da Xunta prevén 7,9 millóns de euros para o corredor Nadela-Sarria, un investimento de 2 millóns de euros tamén en 2027 para avanzar dende o consenso na rolda Leste, e 516.176 euros para a Serra de Meira dentro do Plan Paradai. Así mesmo, destacan os 248.200 euros destinados á protectora de animais entre os anos 2026 e 2027 e a partida de 1,2 millóns de euros reservada para a ampliación do Anxo Carro. A todas estas actuacións súmase o proxecto de abastecemento e saneamento na N-540 ao seu paso por Esperante, cunha partida asignada de 126.993 euros.
Investimentos nas persoas e nos servizos públicos
A sanidade, a educación e a atención social constitúen o outro gran eixe dos investimentos previstos para a cidade. No eido sanitario, ademais dos 600.000 euros para a contratación do proxecto do centro de saúde do Sagrado Corazón, as contas autonómicas inclúen máis de 1,6 millóns de euros para a segunda fase do acelerador lineal do HULA e 870.000 euros para a reforma integral do centro de saúde da Milagrosa. Do mesmo xeito, no barrio da Residencia prevese reforzar os servizos sanitarios mediante a incorporación de recursos de saúde mental ao edificio que actualmente se atopa sen uso, aproveitando así un espazo existente para achegar novos servizos á veciñanza.
No eido educativo, a Xunta prevé investir 1,3 millóns de euros para continuar coas obras de rehabilitación integral no CEIP de Nadela, 483.400 euros para a ampliación do IES Muralla Romana e 180.000 euros para o CIFP As Mercedes. A estas actuacións engádese a gratuidade das escolas infantís, da que se benefician máis de 1.300 nenos e nenas na cidade cun investimento duns 3 millóns de euros, xunto cos 4,7 millóns de euros destinados á acreditación de excelencia do Campus Terra no período 2025-2029.
Por outra banda, o investimento social inclúe máis de 9 millóns de euros para o Bono Coidado no Fogar, dirixido a un total de 1.800 beneficiarios, 3,34 millóns de euros para o Servizo de Axuda no Fogar e un millón de euros para continuar as obras de mellora nas residencias públicas das Gándaras e da Milagrosa.
Máis oportunidades de emprego e acceso á vivenda
O impulso á actividade económica recolle tamén 100.000 euros para a ampliación do polígono das Gándaras, un espazo que contará con máis de 2 millóns de metros cadrados de superficie. En materia de desenvolvemento urbano, a Xunta inviste 60 millóns de euros para vivenda de nova construción e 1,6 millóns en solo residencial. Deste xeito, Lugo situase como a terceira gran cidade de Galicia onde se desenvolven máis Vivendas de Protección Pública, superando as 600 unidades. Ademais, está previsto que neste mesmo ano se aprobe definitivamente o PIA do Sagrado Corazón, ao que se destinan 1,9 millóns de euros.
A alcaldesa, Elena Candia, concluíu incidindo en que o modelo de cidade combina o impulso das infraestruturas co investimento nas persoas, pero tamén coa xestión necesaria para que os proxectos avanzan. O goberno local continuará traballando para desbloquear actuacións, completar os trámites pendentes e converter os compromisos en melloras concretas para Lugo e a súa veciñanza.
