Unha persoa resultou ferida este venres tras sufrir unha caída desde unha escaleira no municipio da Fonsagrada, o que obrigou á súa evacuación nun helicóptero medicalizado.
Segundo a información facilitada polo 112 Galicia, o accidente produciuse pasadas as 12.00 horas no lugar de Vilarmaior, situado na parroquia de San Martín de Arroxo. Foi un particular quen deu a voz de alarma ao centro de emerxencias para solicitar asistencia.
A raíz do aviso, mobilizáronse efectivos de Urxencias Sanitarias de Galicia-061, axentes da Garda Civil e voluntarios de Protección Civil da Fonsagrada.
Debido ás lesións, os servizos sanitarios desprazaron ata o punto o helicóptero medicalizado con base en Ourense. Tras ser atendido no lugar, o ferido foi trasladado a bordo da aeronave ao Hospital Universitario Lucus Augusti (HULA) de Lugo.
