O Deputado de Formación, Ensino e Economía do Coñecemento, Miguel Fernández Méndez, participou este xoves no acto de entrega do X Premio Peme do Ano Lugo 2026, o galardón que pon en marcha a Cámara de Comercio de España, a Cámara de Comercio de Lugo e o Banco Santander. Nesta edición, a entidade galardoada con este recoñecemento foi para Logística Reyco, unha compañía de transportes con sede en Foz e case 30 anos de traxectoria, recoñecida pola súa expansión internacional, a súa estabilidade comercial e a súa forte aposta pola creación de emprego.
Durante o evento, que se celebrou na Palloza, o Deputado destacou a importancia de recoñecer o labor do tecido empresarial lucense e subliñou o papel das PEMES no desenvolvemento sostible do territorio.
“O apoio ás pequenas e medianas empresas é unha aposta polo desenvolvemento sostible e equilibrado dun territorio que segue ofrecendo oportunidades”, sinalou en referencia á excelencia das empresas galardoadas. Felicitou á Cámara de Comercio pola organización destes premios, que “conseguen ano tras ano poñer rostro ás empresas que fan medrar esta provincia”. E engadiu ademais que o conxunto de proxectos recoñecidos “demostran a diversidade e a fortaleza do tecido empresarial lucense”, que representa o 97% do tecido empresarial da provincia.
Nesta edición foron distinguidas tamén Transmedia Comunicacións e Prensa, co Accésit de Dixitalización e Innovación; Zuri Investiments, co Accésit de Formación e Emprego; Terras de San Martiño de Pacios, co Accésit de Internacionalización; e Gestión Gratelu, co Accésit de Peme Sostible.
Así mesmo, na categoría de Mención Especial ao Legado Empresarial, unha das principais novidades desta edición, foi distinguido o Grupo El Progreso pola súa longa traxectoria e ao seu impacto social e económico na provincia.
