O BNG plántase contra a crecente presenza do Exército nas rúas e nos centros de ensino. A formación vén de presentar en Lugo a campaña ‘En Galicia: paz, soberanía e dereitos’. O seu obxectivo máis inmediato: esixir a suspensión do gran desfile militar previsto en Vigo. A fronte nacionalista chama a toda a poboación a manifestarse o vindeiro día 30 na cidade olívica.
Rexeitan frontalmente o que cualifican como unha “normalización do militarismo” promovida polo Estado e que conta co aval do Goberno galego. A secretaria nacional de Organización, Lucía López, e o líder de Galiza Nova, Artai Gavilanes, foron os encargados de debullar a ofensiva. Ambos alertaron de que as institucións están a fomentar unha perigosa “cultura da guerra” na sociedade galega.
MILLÓNS PARA DEFENSA EN PLENA CRISE
López puxo o foco no desvío de cartos públicos. A dirixente lembrou que a Xunta impulsou unha estratexia de seguridade e defensa que mobilizará máis de 900 millóns de euros na industria armamentística e aeroespacial galega. O Bloque denuncia que todos eses enormes recursos “deberían destinarse a cubrir carencias urxentes en sanidade, vivenda ou dependencia”.
Ademais, o BNG asocia o actual encarecemento da vida ao papel submiso da OTAN ante a estratexia dos Estados Unidos. Aseguran que os conflitos bélicos internacionais teñen consecuencias directas na suba da cesta da compra e dos combustibles en Galicia.
A GARDA REAL NOS COLEXIOS
A formación tamén amosou o seu total rexeitamento ás recentes manobras da Garda Real na provincia de Lugo. Os nacionalistas denuncian o uso de espazos educativos para facer descarada “propaganda militar e da monarquía” entre os nenos. “Estase empregando á rapazada para enaltecer o españolismo e reforzar a idea da sacrosanta unidade do Estado español”, criticou duramente Lucía López, acusando ao Exército de tentar coarse nas escolas para venderse como unha simple alternativa laboral.
Na mesma liña, Artai Gavilanes reivindicou o ADN antimilitarista de Galiza Nova. O líder xuvenil insistiu na necesidade de encher as rúas de Vigo o vindeiro 30 de maio para frear a exhibición das Forzas Armadas.
