Este mediodía inaugurouse no Museo Provincial de Lugo a exposición “TOCA “R”, DANZA “R”, cunha docena de esculturas procedentes do Museo Tiflolóxico da ONCE, creadas tanto por artistas con discapacidade visual grave como por autores sen ella, que teñen como nexo temático a danza,.
A deputada de Cultura Iria Castro asistiu ao acto inauguración no que as persoas asistentes participaron nunha visita guiada da man de Ánxeles Miguélez, membro do departamento de didáctica da Rede Museística e persoa con discapacidade visual.
A exposición explora a relación histórica entre a escultura e a danza, dúas disciplinas que comparten o corpo humano como canle de expresión, así como o uso do espazo, o tempo e o movemento. Mentres a danza transforma o corpo nunha escultura dinámica, a escultura fixa ese movemento, permitindo que a figura baile de xeito permanente a través da materia.
As pezas seleccionadas permiten ao público achegarse a diferentes expresións corporais mediante o tacto. Esta aproximación táctil facilita a comprensión do corpo como medio artístico, máis alá da propia natureza do material escultórico. A través da forma, a composición e o xesto, as obras capturan a enerxía e a fluidez do baile, trasladando ao espectador o dinamismo e o sentimento propio da linguaxe coreográfica.
Cada escultura toma como modelo diversas danzas que representan rituais, crenzas e herdanzas culturais transmitidas ao longo do tempo. Deste xeito, as pezas posúen un significado concreto e único que transcende o seu valor estético, convidando a unha reflexión sobre a comunicación e a narrativa a través do movemento conxelado na forma.
A mostra pode visitarse no Museo Provincial de Lugo ata o 18 de outubro.
