A maxistrada do Tribunal de Instrución número 2 de Mondoñedo decretou este luns a prisión provisional comunicada e sen fianza para o home detido na localidade de Quende, en Abadín, pola morte dun veciño de idade avanzada que desapareceu sen deixar rastro fai tres anos.
O detido será investigado por un delito de homicidio, cumprindo así as expectativas da familia, que pedía esta medida porque existía “risco de fuga, tanto polo tipo de delito, como porque el está adoitado vivir fóra”, segundo sinalou Paula Salvador, avogada da acusación particular.
O acusado chegou a declarar a Mondoñedo ao redor das 9.15 horas, esposado e acompañado por dúas dotacións da Garda Civil. Paula Salvador asegurou antes da declaración que a familia non ten claro que os feitos fosen “accidentais” e que se “pechará o ciclo” cando haxa unha condena.
Unha vez terminada a declaración, Salvador explicou tamén que o investigado incorreu en varias contradicións, algunhas en relación coas probas periciais, e mantén a tese de que foi un homicidio doloso.
“A familia está a vivir estes días con moita dor tras atoparse os restos, pensando no feito de ser pasto das alimañas”, explicou Salvador en relación ao estado dos familiares do falecido, os seus curmáns, xa que o home non tivera nin fillos nin irmáns.
COLABORACIÓN DO DETIDO
Pola súa banda, o avogado da defensa, Miguel Fernández, asegurou que a colaboración do acusado está a ser total e que respondeu a todas as preguntas da xuíza, a Fiscalía e a acusación particular.
Como dixo durante a toma de declaración, atropelou a Enrique Bolívar nunha curva, concretamente nunha zona de baixa visibilidade porque estaba pendente dunha leira próxima. O home chegou a dicir que tras o atropelo achegouse a casa dun dos curmáns e mesmo chegou a chamalo para avisalo do sucedido, pero este non estaba en casa.
O pánico levoulle a desfacerse do cadáver e este luns manifestou o seu arrepentimento polo sucedido. O letrado pediu “respecto e prudencia” nas informacións e comentarios sobre el, “algunhas falsas”, e lembrou que “ten unha discapacidade psíquica e adicción a sustancias, o que o fai unha persoa vulnerable”.
O RELATO DOS FEITOS
O acusado recoñeceu ser o autor dos feitos a pasada semana durante unha primeira declaración ante a xuíza de instrución de Mondoñedo. Tras facer unha reconstrución dos feitos pola mañá, o home, que non colaborou en ningún momento, cambiou de actitude pola tarde e confesou os feitos.
O investigado explicou que atropelou accidentalmente a Enrique Bolivar, asustouse e subiu o cadáver do home ao seu coche para abandonalo nun piñeiral próximo, lugar ao que conduciu aos axentes. Días despois o seu coche apareceu calcinado en Ribadeo.
Aínda que as investigacións policiais centráronse nel desde o primeiro momento, fai tres anos, non se atoparon indicios da súa culpabilidade ata agora. O home estaba xa en prisión por unha condena por roubo que estaba a piques de finalizar.
Esta declaración prodúcese despois de que tres restos óseos achados na leira de Quende e enviados ao departamento de bioloxía do servizo de criminalística, en Madrid, coincidisen co ADN de referencia de Enrique Bolívar.
