Un camión que transportaba leite envorcou este luns no municipio lucense de Vilalba, provocando a interrupción da circulación na zona. O suceso tivo lugar pouco antes das 15,00 horas no quilómetro 10 da estrada LU-541, á altura da parroquia de Ladra. Tras recibir a alerta dun particular a través do 112, activouse un dispositivo de emerxencias ante a posibilidade de que o condutor estivese atrapado, aínda que finalmente puido saír do habitáculo polos seus propios medios.
No operativo participaron efectivos de Urxencias Sanitarias de 061, os Bombeiros de Vilalba, a Garda Civil de Tráfico e os servizos de mantemento da estrada. Como consecuencia do impacto, o vehículo sufriu unha perda de combustible, que foi controlada polos bombeiros desprazados ao lugar para evitar maiores riscos ambientais.
