A presidenta da Deputación de Lugo, Carmela López, pediu “tempo” antes de entrar en valoracións sobre a sentenza do Tribunal Supremo que estimou o recurso de casación interposto polo Partido Popular contra o fallo do TSXG que avalaba a entrada da Deputación de Lugo no accionariado de Tragsa. Segundo o tribunal, a decisión debería pasar pola intervención do Pleno “debido á súa transcendencia organizativa e financeira”.
En declaracións aos medios durante unha visita ás obras de Infanta Elena, Carmela López sinalou que trasladará unha resposta nos próximos días e que se preocupou por esta cuestión “nada máis chegar” á presidencia da institución provincial. Con todo, acusou ao Partido Popular, que fixo o xoves unhas declaracións moi críticas, de “pretender capitanear esta acción”.
Carmela López pediu algo de tempo para poder estudar esta sentenza que conclúe que a adquisición da participación en Tragsa e a utilización desta entidade como medio propio mediante un sistema de cooperación vertical leva unha decisión con transcendencia organizativa. “Levo apenas un mes, teño varios conflitos, problemas e expedientes encima da mesa e este é un deles. Pero antes de ofrecer ningunha conclusión hai que estudalo, ir paso a paso, é como me gusta traballar”, explicou, para concluír que nos próximos días trasladará unha resposta sobre as accións que se tomarán.
Este xoves, o Partido Popular celebrou a sentenza lembrando tanto á presidenta da Deputación, Carmela López, como ao expresidente, José Tomé, ao PSOE e ao BNG, que “ten que quedarlles máis claro que non están por encima da lei”. Ademais, os representantes do Partido Popular quixeron reivindicar que esta sentenza “reforza” o seu papel como “garantizador da legalidade”.
Antes das palabras da presidenta este venres, a Deputación emitiu un comunicado no que acusou aos ‘populares’ de tentar enganar con informacións terxiversadas “sobre o alcance da sentenza”, lembrando que esta non anula nin invalida o acordo, como tampouco se pronuncia sobre os encargos realizados a Tragsa, polo que asegura que “resulta incorrecto e xuridicamente inexacto afirmar o contrario, como fai o PP”.
