Os senadores do Partido Popular pola provincia de Lugo, José Manuel Barreiro, José Manuel Balseiro e Juan Serrano, reclamaron ao Goberno Central explicacións e solucións ante a “grave deterioración” da estrada nacional N-6 ao seu paso por Becerreá. Tal e como trasladou o PP nunha nota de prensa, os senadores rexistraron, a petición do portavoz de Becerreá, José Fernández Carrete, unha pregunta dirixida ao Goberno.
Segundo expuxeron, o tramo afectado dá acceso aos núcleos de Cruzul, Ousón e Guillén, sendo unha vía “fundamental” para a mobilidade diaria de “numerosos veciños” que “levan tempo sufrindo as consecuencias dun firme en moi mal estado”. En concreto, a zona degradada sitúase entre os puntos quilométricos 464+700 e 467+200, onde o pavimento presenta fochancas e firme desfeito que, segundo denuncian, “dificultan a circulación e supoñen un risco para a seguridade viaria“.
Así mesmo, os representantes populares advertiron do malestar da veciñanza porque este tramo “leva moito tempo acumulando danos sen que o Goberno actúe”. Por iso, os senadores lucenses preguntaron ao Executivo que actuacións concretas ten previsto acometer para solucionar as deficiencias do firme neste tramo da N-6 e, especialmente, en que prazos pensa facelo.
