A circulación ferroviaria entre Monforte de Lemos e a parroquia de Laxosa, no Corgo (Lugo) —a pouco máis de 10 quilómetros da capital provincial—, quedou restablecida a media tarde do sábado tras ser interrompida pola rotura “intencionada” dunha catenaria e un posterior desprendemento de ménsula.
O suceso obrigou a suprimir parcialmente dous trens de Media Distancia (MD) e a transportar aos seus viaxeiros por estrada entre Monforte e Lugo, segundo informou o Adif a través da rede social ‘X’. Tamén se viron afectados tres trens de Longa Distancia (LD), cun atraso medio de 17 minutos, e outro MD, que sufriu unha demora de 10 minutos sobre o seu horario previsto.
A entidade estatal informou do acontecido ao redor das 13.00 horas deste sábado e asegurou que a fractura —que se produciu en varios puntos da rede— sería “intencionada”, aínda que polo momento se descoñece que ou quen a ocasionou. Adif tamén detallou que o suceso se localizou no treito comprendido entre Laxosa, Pobra de San Xiao (parroquia de Láncara) e Sarria.
