Veciños e veciñas de Guitiriz, xunto coa corporación municipal, concentráronse este venres fronte ao Consultorio de Parga para reclamar ao Sergas unha solución inmediata á falta de médicos e ao novo peche temporal das instalacións, que permanecerán sen atención facultativa durante todo o mes de decembro. A alcaldesa, Marisol Morandeira, denunciou que se trata dun recorte que afecta directamente ao benestar da poboación.
A mobilización, convocada polo Concello ás 11.30 horas, reuniu decenas de persoas e expresou un rexeitamento social ás medidas adoptadas tras o concurso de traslados de Atención Primaria, que deixa o municipio con só dous médicos titulares atendendo no centro de saúde. Como consecuencia, o Consultorio de Parga ofrecerá exclusivamente servizo de enfermaría.
Esta situación prolonga un longo historial de peches intermitentes do consultorio, iniciado durante a pandemia coa centralización de atención motivada pola covid. A reapertura do centro produciuse anos despois sen recuperar todos os servizos previos, mantendo a preocupación da veciñanza pola falta de facultativos e a necesidade dunha cobertura sanitaria estable e próxima.
A alcaldesa subliñou que o municipio supera os 5.000 habitantes e que o desprazamento a Guitiriz supón un problema engadido para persoas maiores. Morandeira reiterou o compromiso do Concello coas reivindicacións cidadás e reclamou ao Sergas a restitución inmediata do servizo médico, agradecendo a resposta masiva da veciñanza, que “demostra que Parga non vai quedar calada ante un recorte que afecta á súa calidade de vida”.
