O Xulgado do Social número 1 de Lugo condenou á Fundación Rof Codina a abonar 14.316,32 euros a unha veterinaria polas diferenzas salariais xeradas durante un ano de traballo no Hospital Veterinario Universitario, ao considerar acreditada a existencia dunha relación laboral encuberta baixo unha bolsa formativa.
A resolución estima integramente a demanda presentada pola traballadora, polas diferenzas entre o salario percibido e o que correspondía segundo convenio entre setembro de 2021 e agosto de 2022. Durante ese período, a demandante percibiu unha retribución mensual de 500 euros como bolseira, a pesar de desempeñar funcións propias dunha veterinaria xeneralista.
O xulgado parte dunha sentenza firme anterior que xa declarara que os bolseiros do centro eran traballadores contratados en fraude de lei, polo que este novo procedemento centrábase en determinar a categoría profesional aplicable.
A controversia virou ao redor da definición da devandita categoría. O sindicato CSIF, representante da demandante, sostivo que a traballadora actuaba como Persoal Veterinario Xeneralista, mentres que a fundación defendeu que o seu posto debía corresponder a un perfil de auxiliar clínico ou, de maneira alternativa, a unha categoría de veterinaria supervisada.
A xuíza deu por acreditado, mediante as probas documentais e testificais, que a demandante realizaba funcións con plena capacidade profesional e sen supervisión constante. Entre os elementos considerados figuran a declaración dunha testemuña que confirmou a súa autonomía na práctica clínica e o informe da Inspección de Traballo, que recollía testemuños doutros traballadores na mesma situación.
Contra a sentenza cabe interpor recurso de suplicación ante o Tribunal Superior de Xustiza de Galicia (TSXG). O sindicato CSIF, nun comunicado, valorou esta resolución como unha “vitoria determinante na defensa dos dereitos laborais e contra o abuso recorrente da figura do bolseiro”.
