Un home de 31 anos perdeu a vida nesta pasada madrugada ao sufrir un accidente de tráfico no termo municipal de Lugo, despois de que o vehículo que conducía saíse da vía e envorcase na estrada LU-612, á altura da parroquia de San Xoán do Campo.
Segundo informou o 112, o sinistro produciuse arredor das 00:45, entre os puntos quilométricos 8 e 9 da citada estrada. O aviso chegou ao Centro Integrado de Atención ás Emerxencias (CIAE) a través dun teléfono móbil que alertaba dun accidente grave.
De inmediato activouse un operativo no que participaron o 061, a Garda Civil de Tráfico, axentes da Policía Nacional e Local e efectivos de Protección Civil.
Nun primeiro momento, barallouse a posibilidade de que o condutor estivese atrapado no interior do vehículo, polo que se requiriu a presenza dos Bombeiros de Lugo, aínda que finalmente non foi necesaria a súa intervención.
O persoal sanitario desprazado ao punto confirmou o falecemento do home no lugar do accidente, sen que se puidera facer nada por salvarlle a vida. As autoridades investigan agora as causas da saída de vía, que non implicou a outros vehículos.
