A secretaria de Organización do PSdeG, Lara Méndez, dixo estar “tranquila” ante a situación do PSOE en Lugo despois de que a pasada semana o goberno da Deputación perdese varias votacións no pleno pola ausencia do tres deputados socialistas que lideraron a candidatura alternativa a José Tomé no proceso de primarias: Iván Castro, José María Arias e Marisol Morandeira.
Preguntada sobre se está conforme coas explicacións dadas por José Tomé, que deu por “resolto” o asunto e que asegurou que hai “vontade de que mellore a coordinación”, Méndez asegurou que está “tranquila” coas declaracións do presidente da Deputación de Lugo e tamén secretario xeral dos socialistas lucenses. Nesta liña, lembrou que Tomé “dixo que se cadra puido haber falta de comunicación que levou a esa situación”; pero, “advertido o problema, trátase de dar solucións”, algo para o que, tal e como apuntou Méndez, “dixo que ía pór as ferramentas necesarias para que non se volva a dar no futuro”.
“Desde o PSOE, cando detectamos un problema, actuamos e dámoslle solución, polo que teño toda a tranquilidade. Se me preguntou polo PP, diríalle que tería serias dúbidas”, respondeu a viceportavoz parlamentaria do PSdeG, que reprochou aos populares que cando “detectan un problema” como a denuncia ao exconselleiro do Mar Alfonso Villares por unha presunta agresión sexual que “coñecían desde febreiro”, engadiu, “non o destituíron ata pasados catro meses”. “Teño esa tranquilidade porque nós cando detectamos un erro, pómoslle solucións e aplicámolas”, insistiu.
