Ademais dos atractivos doutras edicións, como son os numerosos postos e paradas que haberá por toda a zona vella, as Xustas Medievais, a Cetrería ou os Campamentos Medievais –un deles infantil–, este ano contarase cun Gran Dragón, o espectáculo ‘Errantes’ –con seres chegados do outro mundo–, e un concerto do grupo medieval Grimorium.

A cidade de Monforte amosa xa, coa decoración de rúas, unha expectación previa que convida a pasar unha fin de semana por todo o alto. Quen se vista de época poderá lucir estes dous días, 19 e 20 de abril, as súas vestimentas e integrarse no ambiente medieval, e tanto estes como o resto poderán mercar unha chea de cousas, participar en actividades e gozar dunha chea de espectáculos, a maioría ubicados na zona histórica. Así, a Praza España, a Praza de Abastos e o barrio xudeu subindo ata a Torre do Homenaxe converteranse no centro neurálxico da cita.

PROGRAMA DA XXI FEIRA MEDIEVAL

SÁBADO 19

Ás 12:00 h. terá lugar a Saúda do Alcalde para declarar aberta a Feira Medieval de 2025 de Monforte acompañado duns pregoeiros que desenvolverán un espectáculo no que informarán aos presentes do que acontecerá a fin de semana na cidade de Monforte. A continuación, haberá unha salva de artillería, cunha réplica dunha bombarda do século XIV, para dar inicio oficial á Feira.

No que respecta ás actividades, comentar que non podían faltar as clásicas e centrais do evento. Neste senso, as que teñen xa o seu espazo fixo: Campamento Medieval da Praza de España, Campamento infantil Medieval xunto ao Convento das Nais Clarisas, Espectáculo de aves de rapiña e cetrería na Praza de San Antonio, Xustas medievais e Gran Torneo Medieval no patio do Colexio dos Padres Escolapios.

Tamén haberá, como é costume, moitas actividades de rúa, musicais e de animación, e os espectáculos nocturnos ideados para a Praza Luis de Góngora e para o Campo de San Antonio.

Como novidades este ano para a XXI edición da Feira Medieval, poderase gozar dos seguintes espectáculos:

–O GRAN DRAGÓN (que aparece frecuentemente na mitoloxía europea e que son frecuentes nas historias e lendas medievais). Sairá da praza de España polas rúas da Feira, o sábado e o domingo ás 20:00 h.

–ERRANTES. Un pasarrúas de noite con orcos, trolls e alimañas… seres saídos da escuridade dos tempos que peregrinan eternamente transportando no seu carro a maior das súas demencias.

-Concerto medieval con Grimonium o sábado ás 20:45 h. na Praza de España.

Como remate á xornada do sábado, ás 21:30 h. na Praza Luis de Góngora terá lugar o espectáculo LÚA, un espectáculo audiovisual e musical de Tamara Pérez que descenderá en grúa dende as alturas creando unha atmósfera de maxia coa súa voz e a danza que interpreta, previa á tirada de fogos de artificio. Logo do espectáculo soltaranse os faroliños que encherán de luz o ceo de Monforte.

DOMINGO 20

Para esta xornada, dende as 10:30 h. e ata as 19:30 h. haberá actuacións musicais e de animación de rúa con 7 grupos, manteranse os Campamentos Medievais, o da Praza de España e o Infantil na Praza das Nais Clarisas, e os espectáculos de cetrería na Praza San Antonio.

Como grandes espectáculos lembrar que nesta xornada tamén aparecerá O GRAN DRAGÓN, que desfilará dende a praza de España polas rúas da Feira ás 8 da tarde; e SUAREN BATAILA, un espectáculo de teatralización, malabares, pirotecnia e lume que actuará na Praza de S. Antonio ás 21:00 horas.

José Tomé, Alcalde de Monforte de Lemos, lembra que “hai motivos dabondo para visitar Monforte, así que os días 19 e 20 de abril esperamos que todos os monfortinos se impliquen na celebración da Feira Medieval e tamén esperamos que sexan moitas as persoas que nos visiten dende o resto de Galicia e do resto do Estado, aos que convidamos a compartir con nós este evento que chega ás 21 edicións ininterrompidas”.

O programa ao detalle pode consultarse e descargar na páxina web do Concello de Monforte de Lemos.